Davide gihagit nga mag- Ice Bucket Challenge

CEBU, Philippines - Miabot na g’yud sa probinsya sa Sugbu ang sikat karon sa internet nga Ice Bucket Challenge diin misalmot dili lang ang mga prominenteng tawo sa international scene apan apil na ang mga politiko.

Niadtong adlaw’ng Martes, gipahigayon ang Ice Bucket Challenge sa Cebu Provincial Detention and Rehabilitation Center (CPDRC), ang prisohan nga naila tungod sa ‘Cebu Dancing Inmates,’ diin gi-nominate ni Jail consultant Marco Toral si Gobernador Hilario Davide III nga dawaton ang maong hagit.

Wala pa mahibaw-i kun dawaton ba sa gobernador ang maong hagit sanglit out-of-the-country pa kini. Matud ni Toral nga nahinabi sa Banat News, 160 dolyares ang ilang iamot ngadto sa Amyotrophic Lateral Sclerosis (ALS) Association, usa ka organisasyon nga mitabang alang sa mga tawo nga adunay ALS, sakit nga makaapekto sa nerve cells. Ang matigom nga kwarta gamiton sa ALS Association alang sa mga research aron makadiskubre og tambal niini ug paghatag og impormasyon sa katawhan mahitungod sa ALS.

Giawhag ang katawhan sa pag-amot ngadto sa organisasyon pinaagi sa “Ice Bucket Challenge.” Sa maong hagit, kinahanglan mag-rekord og video ang usa ka tawo nga gibuboan og usa ka balde nga tubig nga dunay ice ug pagkahuman iya i-nominate ang laing tawo nga modawat sa hagit.

Sa patakaran niini, mahimong modonar og 10 dolyares ang tawo nga misanong sa hagit o 100 dolyares sa mga gustong modonar lang ug dili mohimo sa maong hagit.

Ang direktor sa Land Transportation Franchising and Regulatory Board-7 nga si Ahmed Cuizon wa ‘sab nagpaulahi sa maong “trending” nga kalihokan diin iyang gi-nominate si LTFRB-6 Regional Director Romulo Bernales ug ang mga media personalities nga sila si Leo Lastimosa sa ABS-CBN ug Bobby Nalzaro sa GMA-7. Midonar og 50 dolyares si Cuizon ngadto sa ALS charity. (BANAT NEWS)