Call center agent nanghinol sikop
CEBU, Philippines - Gidakop sa guwardiya sa mall ang usa ka call center agent human gireklamong nanghinol sa pribadong bahin sa lawas sa 9 anyos nga batang babaye niadtong Lunes sa hapon.
Giila ang call center agent nga si Barry Escarda Rastauro, 31, ulitawo, taga Deca Homes, Dumlog, dakbayan sa Talisay.
Asoy sa inahan sa bata ngadto sa kapolisan nga samtang nalingaw og pili sa pugong sa buhok ang iyang anak ug siya naglinya sa counter sa Elizabeth Mall, kalit lang midagan ang bata nga nangayo og tabang kay gihinol sa suspetsado ang iyang sampot ug atubangan nga bahin.
Daling gipangita sa inahan ang lalaki ug uban sa tabang sa guwardiya sa maong mall nasikop ang suspetsado.
Sumala ni PO2 Venus Tampus sa Women’s Desk sa Carbon Police Station nga giangkon sa suspetsado ang pasangil.
“Mahilig gyud ni siya og bata, wala man pud niya gi-deny ang hitabo, nangayo lang og sorry,†matud ni Tampus.
Gitanggong sa Carbon police station ang suspek samtang ikiha gyud og kasong act of lasciviousness ug violation of Child Abuse Law human wala dawata sa ginikanan sa bata ang pagpangayo og pasaylo. (/GMR)(BANAT NEWS)
- Latest
