Pagpangrehestro sa COMELEC ipadayon

CEBU, Philippines - Ang pagpangrehestro sa mga botante alang niadtong mobotar sa eleksyon sa 2016 ipadayon na ugma’ng adlawa sa lainlaing buhatan sa Commission on Elections.

Matud ni Atty. Ferdinand Gujilde, ang provincial election supervisor sa Sugbo, nga giusab nila ang pagpangrehestro diin abli ang Comelec sa adlaw nga Domingo.

Kini gitumong aron nga kadtong mga nagtrabaho kahatagan og higayon nga makaparehestro nga dili na kinahanglan nga mopalta sa ilang trabaho.

Ang mga adlaw nga modawat og rehestro sa mga botante ang Comelec mao ang Martes, Miyerkules, Huwebes ug Domingo. Ang Sabado maoy magsilbi nga pahuway sa mga kawani samtang ang Biyernes ug Lunes maoy pag-asikaso nila sa ilang dukomento.

Mahimo’ng magparehestro kadtong gusto nga mobalhin sa pagbotar, pag-usab sa ngalan diha sa Comelec records ug uban pa.

Kadtong mga botante nga natangtang na ang ilang ngalan sa listahan mahimo usab nga moparehestro pagbalik sa Comelec.

Mipahimangno ang Comelec sa mandatory biometrics alang sa mga botante ug mga aplikante.

Nagkanayon si Gujilde nga dili na makabotar unya sa 2016 kun wala’y biometrics subay sa Mandatory Biometrics Registration Act of 2013.

Dinhi sa probinsya sa Sugbo aduna pay kapin 260 mil ka botante ang walay biometrics gikan sa 2.3 million ka mga botante.

Gilauman nga motaas pa ngadto sa 10 porsiyento ang magparehistro dinhi sa probinsya sa Sugbo.(/RUB)(BANAT NEWS)