Holy week di angay isuroy –Palma

CEBU, Philippines - Ang Bendita sa Lukay maoy timaan sa mga Katoliko nga magsugod na ang Semana Santa, kini ang pagtimaan sa adlaw nga mibalik si Hesukristo sa Jerusalem diin siya gilutos hangtud nga gihukman nga mamatay sa Krus.

Si Cebu Archbishop Jose Palma sa iyang Misa kagahapon sa Cebu Metropolitan Cathedral mibutyag nga ang Passion Sunday nagpakita sa mga sakripisyo nga gihimo sa Diyos. Nanghinaot si Palma nga himoong balaan ang pagsaulog sa Semana Santa pinaagi sa paghimo sa mga buhat nga makapahimuot Labaw’ng Makakagahom.

Gidugang sa Arsobispo nga dili lang angay bakasyon ang huna-hunaon sa Semana Santa tungod kay dili kini maoy sentro sa maong kasaulogan. Giawhag ni Palma ang katawhan nga mamalandong ug paminawon ang “Siete Palabras.” (BANAT NEWS)