HPG-7 dili na angay tanggungon

CEBU, Philippines - Ang pangulo sa Special Investigation Task Group- Archival nga nag-imbestigar sa pagbanhig ug pagpatay ni Atty. Noel Archival ug duha ka kauban mitataw nga dili na kinahanglan nga tanggungon pa sa kampo ang mga sakop sa PNP Highway Patrol Group-7. Si Senior Superintendent Noel Gillamac, direktor sa Cebu Police Provincial Office (CPPO), mihimo sa pamahayag agi og reaksyon sa awhag sa Cebu City Council nga ang mga sakop sa HPG ibutang sa camp restriction samtang magpadayon ang imbestigasyon sa kaso.

Samtang ang SITG ug National Bureau of Investigation (NBI)-7 mipadala na og suwat ngadto ni PNP Chief Alan Purisima nga nag-awhag nga ipa-ballistics test ang tanang armas nga giisyu sa HPG-7. Matud ni Gillamac nga ang tanang Armalite rifles ug 9 milimeter pistols ang ilang ipa-ballistics sa PNP Regional Crime Laboratory aron ang slugs ug kapsula itandi sa mga na-recover didto sa Barangay Coro, Dalaguete nga didto gibanhigan sila si Archival ug kaubanan.

Gitataw ni Gillamac nga sila si HPG-7 director Sr. Supt. Romualdo Iglesia, Sr. Insp. Joselito Lerion ug kanhi property custodian, SPO4 Edwin Galan, dili mga suspek kundili subject lang sa ilang imbestigasyon. Apil nga namatay sa pagbanhig mao si Candido Miñoza ug Alejandro Jaime samtang angol si Paulo Cortes.

Samtang gibutyag ni Police Regional Office (PRO)-7 director Danilo Constantino nga wala maapektahi ang maayo nga relasyon nila ug sa Highway Patrol Group-7 bisan og ang ilang hepe giimbestigar. Matud ni Constantino nga padayon ang ilang kumunikasyon ug sa hepe sa HPG-7 ug gani giimbitar siya kagahapon nga guest sa pagpasiugda og motorcycle riding course sa HPG-7 agi og pangandam sa umaabot nga Asia Pacific Economic Cooperation (APEC) meeting dinhi sa Sugbo. /RUB (BANAT NEWS)