Pugante napusilan angol sa polis
CEBU, Philippines - Nalandig sa tambalanan ang usa ka pugante human kini masabak sa bala sa kapolisan nga iyang gisuklan didto sa sitio Cambuntan, barangay Bolinawan dakbayan sa Carcar sa miaging hapon.
Ang samaran nailhan nga si Climaco Alenton, hingkod, kinsa napriso sa Leyte Regional Prison tungod sa kasong pagpangawat ug kalambigitan niini sa ginadiling drugas.
Matud pa ni SPO3 Jorame Tanudtanud sa Carcar Police Station nga sayo niini nakadawat sila og taho kalabot sa presensya ni Alenton sa maong dapit human kini nakaeskapo niadtong Agosto 16 ning tuiga.
Dali nga milihok ang kapolisan pag-adto sa maong lugar ug sa ilang pag-abot didto gipamusil sila sa suspetsado ug walay naigo kanila.
Si SPO1 Irveng Avila maoy mibalos og pusil kang Alenton ug naigo kini sa tuong bahin sa iyang tiil nga milapos sa iyang sampot.
Daling gidala sa Carcar City District Hospital apan gibalhin usab dayon si Alenton sa Vicente Sotto Memorial Medical Center sa dakbayan sa Sugbo.
Matud pa ni Tanudtanud nga human nakaeskapo sa karsel sa Leyte si Alenton giingong milahos dayon sa ilang balay sa maong lugar.
Gipadayag usab ni Tanudtanud nga dugay na silang nagpangita kang Alenton human ang kapolisan sa Abuyog, Leyte nakig-alayon kanila kalabot sa iyang pag-ikyas. Apan sa wala pa kini mabalhog sa karsel sa Leyte gihulagway ni Tanudtanud nga sulod gawas kini sa karsel sa Carcar City Police tungod sa kasong pagpangawat.
Dugang pa ni Tanudtanud nga makig-alayon sila karon sa kapolisan sa Abuyog aron usab mahibalik si Alenton ngadto sa Leyte.
Napunitan sa kapolisan ang kalibre .38 nga gituohang maoy gigamit ni Alenton pagpusil ngadto sa kapolisan. (BANAT NEWS)
- Latest