Daanbantayan moayuda sa DOH bahin sa gipasirhang menteryo

CEBU, Philippines - Moayuda ang kagamhanan sa lungsod sa Daanbantayan sa pagpanday sa rekomendasyon sa Department of Health   kalabot  sa gipasiradong mga sementeryo sa lungsod.

Kini ang hangyo ni Mayor Augusto Corro isip tubag sa suwat ni DOH 7 Regional Director, Dr. Asuncion Anden, nga nagpahimangno kaniya sa balaud sa pagpadagan og sementeryo.

Si kanhi mayor Ma. Luisa Loot nisumbong sa DOH sa giingong pagtugot ni Corro nga malubngan na ang mga gipangsirado nga mga sementeryo sa iyang administrasyon.

Apan si Corro niinsister nga subay sa suwat nga gipetsahan og Nobiyembre 22, 2011, si Atty. Marino Martinquilla sa Cebu Provincial Legal Office miingon nga ang pagpasirado ni Loot sa mga sementeryo usa ka illegal.

Gani gimandoan pa ang kapolisan sa pagpatunhay sa kalinaw ug dili ipatuman ang kamandoan sa pagpasirado niini.

Gipasalig ni Corro nga andam siya moayuda sa DOH sa pagpahigayon sa “status inventory” sa mga sementeryo subay sa gimando sa Kapitolyo.

Si Loot kinsa napilde  ni Corro  sa miaging eleksiyon nisumbong sa DOH nga bisan sa wala pa milingkod si Corro, daghan na sa iyang mga tigpaluyo ang milubong na sa ilang mga patay sa mga sementeryo nga gipasiradoan.

Hinungdan nga si Corro gipahimangnoan ni Anden sa lagda sa Presidential Decree 856 nga mao ang Sanitation Code of the Philippines.

Ang Daanbantayan adunay 42 ka pangpublikong mga sementeryo apan ang 37 gimandoan sa DOH nga pasirad-an niadtong 2010 nunot sa daghang kalapasan.

Sa pagkakaron, ang lungsod adunay lima ka sementeryo nga bukas nga anaa sa barangay Bitoon, Maya, Talisay, Tuminjao ug Calape. (/WC) (BANAT NEWS)