Deputy police chief sa Bogo gikasoha’g murder
CEBU, Philippines - Gipasakaan na og kasong murder kagahapong adlawa diha sa piskalya sa Bogo City si Chief Insp. Ceferino Tabay ang deputy chief sa Bogo City Police human niini gipusil patay ang hinigugma sa iyang anak niadtong Biyernes sa hapon sa barangay Guadalupe dakbayan sa Bogo.
Matud pa ni Paul Montesclaros ang amahan sa namatay nga si Vincent Paul nga ila nang gipasaka ang kasong murder batok kang Tabay.
Dugang pa ni Paul nga wala mapaubos sa paraffin test ang ilang anak ug ila pa usab kini ipaawtopsiya aron masayran kun pila gyud ka samad pinusilan ang naangkon sa ilang anak.
Ang hepe sa kapolisan sa Police Regional Office Chief Supt. Marcelo Garbo Jr., mipadayag usab nga iya nang gimandoan ang kapolisan sa Cebu Provincial Police Office nga mopahigayon og halawom nga imbestigasyon kalabot sa maong insidente.
Gihulagway ni Garbo nga dunay epekto sa organisasyon sa kapolisan ang susamang mga hitabo. Ang mga ginikanan sa biktima namasangil nga gikulata una pa gipatay ang ilang anak sa maong polis. Ang biktima ug ang 16-anyos nga anak ni Tabay giingong manag-uyab ug naabtan niini ang duha nga nagkuyog sa usa ka payag.
Matud pa sa unang pamahayag sa hepe sa Bogo Police Station si Tabay nangangkong iyang naabtan ang anak nga nagkadugo ang ilong ug nagkupot og armas ang biktima maong iyaha kining napusilan.
“Dako kaayo nang imposible, maglisod man gani mi og palit og bugas, armas na hinoon among unahon,†matud pa sa amahan sa biktima. (BANAT NEWS)
- Latest
