Nakapusil sa 2 anyos nga bata gikasohan na

CEBU, Philippines - Gipasakaan na og kasong “Frustrated Homicide” sa kapolisan ang mga responsabli sa pagpamusil  kansang  bala  sa armas  didto  motaroy  sa lawas   sa usa ka batang dos anyos didto sa Seaweed, sa Brgy. Pusok dakbayan sa Lapulapu sa milabay’ng Martes sa buntag.

Ang  nag-atubang  og  kaso  mao sila si Jeffrey Daitol ug Christopher Ngujo, pulos hingkod, mga drayber  sa traysikol  ug pulos  molupyo  sa   Sitio Paradise, Brgy. Pajo dakbayan sa Lapulapu.

Si P/SInsp. Zenaido Pastorfide   sa Lapulapu  City Police  Station miingon  nga human sa ilang gihimong pakisusi nasayran   nga  ang duha ka mga suspetsado  nagpinusilay   sa maong  higayon kay  nag-inilogay  sa  pasahero.

Apan imbis   silang  duha  ang  mangaigo, ang  bata nga  si Christian Cambaya nga taga  Seaweed Brgy. Pusok dakbayan sa Lapulapu  maoy  nasabak  sa saag  nga  bala.

Sa pagsubay  sa   kapolisan sa  duha ka suspek wala na kini   sa ilang  tagsa-tagsa  ka  balay   ug   giingong  nakalayas  na.

Kahinumdoman si Cambaya uban sa iyang apohan nga si Eufemia Avila   naglakaw  sa karsada  dihang ang duha ka   suspetsado   naglalis  gumikan sa panag-ilog sa pasahero   nga  misangko  sa ilang  pagpinusilay .

Gumikan  kay  walay  praktis,  misulimbag  ang  bala  busa   imbis  usa  kanila  ang  maigo,  ang bata  nga  didto  ra  sa daplin  sa karsada  maoy  nasabak  sa bukton.

Hinuon  maayo  na  ang  kahimtang  sa biktima  sulod sa hospital  nga  nag-atiman  niini. (BANAT NEWS)