4-0 target sa Meralco
CEBU, Philippines - Nanghinaut ang Meralco Bolts nga magpadayon ang ilang maayong kampanya sa PBA Governors’ Cup.
Ang Bolts laraw nga mokulit sa ikaupat nilang sunod-sunod nga daog sa dihang ilang sangkaon ang Kia Picanto karong alas-6:45 sa gabii didto sa Smart Araneta Coliseum.
Apan sa dili pa ang ilang duwa, magsangka una ang Blackwater Elite ug Phoenix Fuel Masters sa alas-4:30 sa hapon.
Mangambisyon gyud ang Bolts nga mobalik sa Governors’ Cup finals. Aron ila kining makab-ot, kinahanglan ang batos ni coach Norman Black nga mowadwad og maayo ilabi sa ilang all-around import nga si Allen Durham.
Si Black magsalig sab sa iyang local scorers sama nilang Jared Dillinger, Reynel Hugnatan ug Chris Newsome.
Ang Bolts bag-o lang mirehistro og dominanteng 89-73 nga kadaogan batok sa Rain or Shine Elasto Painters ug taas ilang kompiyansa batok sa wala pa’y daog nga Kia.
Ang Kia natagak sa 0-4 nga baraha ug kon mapilde sila karon monipis ang ilang kahigayonan sa playoffs karon nga conference.
Si Picanto coach Chris Gavina magsalig gihapon sa import niining si Markeith Cummings nga igo lang mihimo og 14 puntos sa katapusan nilang duwa batok Barangay Ginebra Kings. (BANAT NEWS)
- Latest
