Duha ka HVI vs illegal nga drugas nangadakpan
CEBU, Philippines — Duha ka giila nga High-Value Individuals (HVI) ang nadakpan sa buy-bust operation nga gipahigayon sa Regional Police Drug Enforcement Unit 7 (RPDEU7) sa M. Oyson Jr. Street, Barangay Sambag 1, Cebu City, alas 3:55 sa kaadlawon sa Mayo 31, 2026.
Ang mga nadakpan mao sila si alyas Archie , 43 anyos, residente sa Barangay Sambag 1, Cebu City, ug si alyas Michael , 50 anyos, residente sa Barangay Pugalo, Alcoy, Cebu. Nadakpan ang mga suspek human nibaligya og gidudahang shabu ngadto sa poseur-buyer nga pulis.
Nasakmit gikan nila ang usa ka medium-sized nga pakete sa gidudahang shabu nga subject sa transaksyon, dugang upat ka dagkong pakete ug upat ka medium-sized nga pakete sa gidudahang shabu , usa ka itom nga sling bag nga gigamit isip sudlanan sa ilegal nga droga, ug buy-bust money.
Base sa imbestigasyon, sulod sa usa ka semana ang gimonitor ang giingong illegal nga kalihokan sa mga suspek.
Gituohang makahalin sila og hangtod 500 gramos nga shabu matag semana ug nag-operate sa tibuok Tri-Cities area sa Metro Cebu.
Ang tanang nakumpiskar nga ilegal nga droga adunay gibanabana nga gibug-aton nga 225 gramos ug adunay Standard Drug Price (SDP) nga P1.53 milyon.
Matud pa sa kapolisan, si Archie napriso kaniadto gikan tuig 2016 hangtod 2022 samtang si Michael nadakpan ug napriso na usab kaniadto tungod gihapon sa illegal nga drugas ug usa ka kaso sa murder gikan sa 1998 hangtod 2024.
Gidala na ang mga suspek sa RPDEU7 alang sa hustong disposisyon samtang giandam ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002 alang sa inquest proceedings. — /IBM (BANAT NEWS)
- Latest
