Compromised agreement giuli sa Hunta

CEBU, Philippines — Gipaabot nga magpadayun kining isyu sa bahin sa giduso nga tax compromise sa pamunoan ni Cebu Governor Pamela Baricuatro bahin sa paghatag og dakong diskwento sa utang sa buhis sa Apo Land and Quarry Corporation (ALQC).

Kini human giuli sa Provincial Board  ang gisugyot nga P211.56-million compromise agreement tali sa maong kompanya ug sa Executive Department imbes nga pabayron sila og P1.2 bilyon nga utang sa buhis. 

Atol sa regular session sa Sangguniang Panlalawigan (SP) niadtong Lunes,  nadesisyonan nga iuli ang proposed resolution nga hatagan og otorisasyon si Governor Pamela Baricuatro nga mosulod sa maong compromise agreement tali ALQC.

Ang rason sa Hunta, kinahanglan pa nilang tun-an og maayo ug duna pay mga klaripikasyon nga kinahanglang buhaton bahin ani.

Ang giuli nga resolusyon pormal nga nadawat sa Executive Department kagahapon, Martes.  “Actually wala man gi specify pero this is already a rejection,” pagtan-aw pa ni Assistant Provincial Administrator Aldwin Empaces.

“Ang basa namo ani is from the side of the Governor, mao naman ni… so the case will continue. Padayon ang kaso,” dugang pa niya.

Sumala pa niya, ang compromise agreement gituyo unta aron dili mosangpot sa kinasohay nga maabtan og pila ka tuig.

 Si Atty. Restituto Arnaiz mipasabot sab nga ang negosasyon tali sa Probinsya ug sa ALQC kabahin ni sa court-mandated mediation process.  Nidugang sad siya nga duna nay mga diskusyong gihimo tali sa ALQC ug sa Provincial Legal Office (PLO),  apan karon nga murag wa pay klaro ang compromise deal, madugay-dugay pa gyud kining maresolba.

Usa ka representante sa PLO ang mikompirmar nga duna nay eskedyul para sa hearing sunod semana kung diin magpresentar na og mga ebidensiya.

Si acting Governor Glenn Soco sa press gathering kagahapon miklaro nga mandato sa Board nga susihon ang mga kontrata ug mga kasabutan. "It’s compelled already of the executive department how they want to proceed basta ang action sa board is limited on the proposed compromised agreement of 211 million, either we approved it or we disapproved it. So in such case, gibalik because we found it unacceptable to the provincial board," pasabot pa ni Soco.

“When you talk about taxes and fees, that’s a very delicate matter… kwarta man na sa katawhan,” dugang pa niya.

Siya miingon nga mao ni ang rason kun nganong dunay check and balance tali sa ehikutibo ug sa lehislatibo sa panggobiyerno.

Sa pikas bahin, si Committee on Ways and Means, chairperson Board Member Michael “Mike” Villamor miingon nga usa sa rason nganong ilang giuli ang proposal mao ang gibutang nga kantidad nga mao ray pabayran ug dili ang pagpangayo og otorisasyon nga maka-negotiate. Matud pa niya dako kaayo ang deperensiya sa original assessment nga P1.218 billion  sa proposed settlement nga P211.56 million.

Sa laing bahin, si kanhi kongresista ug igsuon ni kanhi Cebu Governor Gwendolyn Garcia nidayeg sa desisyon sa Board.

“Nisinggit ang katawhan, ug kamo naminaw,” matud pa niya sa iyang post sa social media ug midugang nga ang sugyot sa ehekutibo nakapatumaw og daghang pangutana.

“Kon ang mga ordinaryong magbubuhis molinya pa aron mobayad sa saktong buhis, ngano’ng hatagan man hinuon ang usa ka adunahan nga korporasyon nga pila ka tuig wa mobayad sa buhis (gani mi-kwestiyon niini sa korte) og 80% nga diskwento?” pangutana pa sa kanhi magbabalaod.

Matud pa niya “grossly disadvantageous to the government”  kun giaprubahan pa. Makwestyon pud ang mga sakop sa Hunta kay magamit sila sa gobernador nga taming batok sa mga legal nga pangutana.

Bahin sa pamahayag nga paandamon sa giyera ang Board, ang kanhi kongresista miingon nga ang angay pangandamang giyera mao ang krisis karon didto sa Middle East kay  nakaepektar  og maayo sa mga ordinaryong Sugbuanon nga kinahanglang tabangan.

Sa laing bahin, bisan wala modetalye sa iyang post sa social media, si kanhi gobernador Gwendolyn Garcia midayeg kang Soco ug sa Sangguniang Panlalawigan.

"To the Cebu Vice-Governor and Members of the Provincial Board -BRAVO!!!," matud pa sa kanhi gobernador.— Gikan sa The Freeman/IBM BANAT NEWS