Frasco nitanyag og P500,000 nga Ganti

CEBU, Philippines — Nitanyag og P500,000 nga ganti si Kongresista Duke Frasco alang sa mga makahatag og tukmang impormasyon kalabot sa anomaliya o iregularidad sa mga flood control projects sa kinto distrito.

Sa iyang Facebook page, ang kongresista nagkanayon nga subay sa awhag sa presidente nga mohimo og imbestigasyon kalabot sa flood control projects nihangyo siya ngadto sa Department of Public Works and Highways (DPWH)-7 nga mopahigayon og review sa tanang proyeko sa kinto distrito.

Matud ni Frasco nga personal nga reward niya ang P500,000 alang sa makahatag og credible nga impormasyon nga makatabang sa pagbutyag sa mga anomoliya o iregularidad sa mga flood control project sa DPWH.

Ang mga adunay impormasyon mamahimong mo contact sa mosunod nga numero o hotline nga 0956-279-4183 ug sa Citizen's Complaint Hotline nga 8888.

Nahimo karon nga kontrobersiyal ang mga flood control project sa nasud human gibutyag ni Presidente Ferdinand “Bongbong” Marcos, Jr. nga adunay pipila ka mga conractor ang nakaangkon og binilyon nga kontrata alang sa maong mga proyekto. 

Nasayran usab nga adunay ghost projects sa maong mga proyekto ug aduany mga opisyal sa gobiyerno nga nakigkunsabo sa mga contractor sa gipatuman nga mga proyekto.

Sa laing bahin, gihagit ni Jun Abines, lead convenor sa Cebu Citizens Anti-Corruption Watch si Frasco nga mohimo og pakisusi sa tanang flood control project sa iyang distrito human kini nipagawas og pamahayag nga mohatag og P500,000 nga reward sa makahatag og impormasyon kabahin sa anomalosong proyekto sa DPWH.

Matud ni Abines nga mas maayo nga ilang makita ni Frasco ang mga proyekto aron masuta kong natuman ang nalatid sa kontrata ug husto ba sa budget nga gitagana.

Si Abines nagkanayon nga mosaludar siya kang Frasco kong makita niya ang tanang proyekto sa kinto distrito nga nahisubay sa nakalatid sa mga dokumento ug sa budget nga gigahin.

Ug kong makita usab nila ni Abines nga adunay mga dili maayo sa mga proyekto dili sila magduha-duha sa pagpasang-at og kaso. BDB BANAT NEWS