Hearing sa kaso ni Teves nauswag

CEBU, Philippines — Kanhi kongresista sa Negros Oriental 3rd District Congressman Arnulfo "Arnie" Teves, anaa sa maayong kahimtang samtang kini pabilin nga naa pa sa tambalanan.

Kini ang gibutyag sa iyang abogado Atty. Ferdinand Topacio kinsa nibisita sa Dakbayan sa Sugbo alang sa mga nagkadaiyang kalihukan.

Sumala pa ni Topacio ang iyang kliyente anaa kini sa tambalanan sa kaulohan human kini nagpaalim sa iyang operasyon nga appendectomy.

Kagahapong adlawa, Lunes gitakda unta nga moatubang sa korte si Teves apan mihangyo sila sa korte nga magpaalim una kini sa iyang operasyon.

Ang arraignment ni Teves, gidis-og na ngadto sa Hulyo 14, 2025 may kalabutan sa kaso niyang murder ngadto sa korte sa kaulohan. Ang mga kaso nga giatubang ni Teves naglangkob sa murder, attempted murder ug frustrated murder human kini giingong maoy nagpaluyo sa pagpatay ni Governor Roel Degamo sa Negros Oriental ug lain mga tawo niadtong 2023. (BANAT NEWS)