CCDRRMO nipahigayon og earthquake drill

CEBU, Philippines — Gipahigayon sa Cebu City Disaster Risk Reduction and Management Office (CCDRRMO) kagahapon sa buntag ang 2nd Quarter Nationwide Simultaneous Earthquake Drill diha sa Plaza Sugbo, atubangan sa Cebu City Hall isip pagtuman sa direktiba sa nasudnong pangagamhanan aron ipahinumdom sa mga empleyado, responders ug katawhan sa angay nga buhaton kong adunay linog.

Kini ang ikaduhang higayon nga nipahigayon og drill ang siyudad karong tuiga nga gitambongan sa kapin 30 ka miyembro sa Cebu City Disaster Risk Reduction and Management Council, kapolisan, kasundalohan, engineering, coast guard, ug uban pang mga ahensiya.

Ang CCDRRMO maoy nag-unang ahensiya nga nagpasiugda sa maong kalihokan nga diin gipakita ang pamaagi sa pagluwas sa mga biktima nga ma-trap sulod sa mga building atol sa linog.

Matud ni Aderson Comar, pangulo sa CCDRRMO nga kinahanglan nga mabansay ang tanang responders ug publiko nga adunay transaksiyon sulod sa city hall.

Gipadayag ni Comar nga kulang pa sa kagamitan ang siyudad sa pagresponde sa mga insidente diha sa tag-as nga building hinungdan nga mao kini ang ilang gipasiugdahan sa drill.

Sunod nga lakang sa ilang plano mao ang pagsulay sa air-to-ground rescue gamit ang helicopter.

Gilaoman nga magpadayon ang libre nga pagbansay matag Sabado ug Domingo alang sa mga empleyado, barangay volunteers ug bisan kinsa nga interesadong makat-on kabahin sa search and rescue ug retrieval operations. (Shiela Mae H. Agrabio ug Christyll Y. Tecson, CNU Interns/BDB) BANAT NEWS