Mga misupak sa road widening paminawon ni Garcia
CEBU, Philippines — Andam maminaw si Gobernador Gwendolyn Garcia sa grupo nga niawhag nga dili pamutlon ang mga punoan sa kahoy sa lungsod sa Poro isla sa Camotes alang sa pagpalapad sa dalan nga proyekto sa maong dapit. "I am willing to call them and we will listen to them..." matud ni Garcia kinsa nagkanayon nga iyang gilaraw ang pagpatawag og tigom aron madungog ang sentimento sa Sto. Niño Parish sa Poro ug sa hingtungdan nga ahensya.
Gikombinser karon sa maong parokya ang gobyerno nga dili pamutlon ang 700 ka mga punoan sa kahoy alang sa road widening.
Gani naninguha kini nga makakuha og 1,000 ka pirma o sobra pinaagi sa usa ka online petition alang sa maong tinguha. Sa May 16 nga adlaw moabot na sa 1669 ang nakuha nga pirma niini.
Ang online petition gisugdan sa simbahan niadtong Abril 10 human nasayran sa plano nga pagpalapad sa dalan sulod sa lima ka barangay ang Mercedes, Esperanza, Adela, San Jose, ug Daan Paz sa lungsod sa Poro.
Ang authors sa maong online petition mao sila si Fr. Joel Bonza, ang pari sa Sto. Niño de Poro Parish; Marieta Gorgonio, Zandro Zurita, Jasmine Villanueva, Vigilia Argallon, Carlotina Santic, ug Nathalie Jane Rosauro.
“Trees are indispensable for our ecosystem…We need sustainable, well balance environment not just in the name of economic progress at the expense of the environment,” pagbasa sa tipik sa online petition.
Si Garcia nagkanayon kinahanglan mapaminaw niya ang habig sa tanang nalambigit niini apil na ang Department of Environment and Natural Resources (DENR) nga maoy ahensya nga nanalipod sa kalikopan ug modesisyon kon unsaon pagbalanse sa kalamboan ug pagpanalipod sa kalikopan.
"I will listen to all sides and look for middle ground" matod ni Garcia. IBM BANAT NEWS
- Latest
