18-anyos gipatay sa ex sa iyang uyab

CEBU, Philippines — Patay ang usa ka 18-anyos nga lalake human siya gipusil sa kanhi hinigugma sa matud pa uyab niya diha sa Sitio Barracks, Barangay Inayagan, Dakbayan sa Naga, kagahapon sa kaadlawon adlaw nga Domingo.

Ang biktima nga 18-anyos residente sa Barangay Pangdan sa naasoy nga siyudad samtang ang suspek nga 35-anyos nga lalake molupyo sab sa maong barangay.

Base sa imbestigasyon sa kapulisan gikan nag-inom ang biktima ug ang hinigugma niini ug nakadesisyon nga mobalhin sa Lungsod sa Minglanilla.

Apan giingong kalit ni chat ang suspek sa usa sa ilang kauban ug nangutana kung asa sila. Wala sab magdahom ang ilang kauban nga dunay dautang plano ang suspek maong gitug-anan niya kini kun asa sila mamalhin og imnanan.

Pag-abot sa lugar giingong gi-atangan sila sa suspek ug laing duha ka kauban niini nga nagsakay og motorsiklo.

Pagkakita sa biktima ug sa uyab niini sa suspek dali-dali silang nidagan apan nakadungog nalang ang matud pa ang uyab og buto sa armas.

Patay diha-diha dayon ang biktima samtang daling misibat ang mga suspek.

Gituohan sa kapulisan nga crime of passion sama sa pangabubho ang hinungdan sa pagpusil sa biktima. — /IBM (BANAT NEWS)