PRO-7 nangandam kun dunay transport strike

CEBU, Philippines — Bisan og wala'y na monitor nga dunay  transport groups nga mipadayag nga molusad og transport strike dinhi sa rehiyon karong Abril 15 ug 16, gipangandaman gihapon kini Police Regional Office(PRO)-7.

Kini human adunay mga transport groups sa kaulohan nga mipahibalo nga molusad og transport strike  may kalabotan gihapon sa nagkaduol nga deadline sa consolidation sa public utility vehicle drivers ug operators nga daan ng gipahibawo ni Presidente Ferdinand Marcos Jr., nga dili na kini lugwayan.

Si Police Lieutenant Colonel Gerard Ace Pelare, tigpamaba ni PRO-7 nagkanayon aduna na silay pagpangandam nga gihimo aron masigurong hapsay ug malinawon ang mga kalihukan.  Giawhag ni Pelare ang mga moapil sa demonstrasyon nga sundon ang balaod ug proseso sama sa pagkuha og permits kun sa publikong mga lugar sila mohimo niini.

Giklaro sab ni Pelare nga ang PRO-7 miila sa freedom of expression ug asosasyon apan kinahanglang dili kini makalapas sa balaod.

Hinuon motabang ang kapolisan sa mga pasaherong matanggong tungod sa ilang libreng sakay anang adlawa kun maparalisar ang transportasyon. (BANAT NEWS)