Duha ka menor responsable sa pagpanglungkab
CEBU, Philippines — Duha ka menor de edad ang giingong responsable sa sunod-sunod nga pagpanglungkab sa Barangay Poblacion, Dakbayan sa Talisay.
Ang maong mga menor nagpangedaron og 9 ug 14-anyos giingong mao usab ang nilungkab sa tindahan nga anaa nahimutang sulod sa compound sa simbahan sa Sta. Teresa de Avila.
Ang opisyales sa Barangay Poblacion pinaagi ni Kapitan Edward Alesna nakadawat og reklamo gikan sa naninda og sud-an diin ang iyang Automatic Tubig Machine (ATM) ang gilungkab.
Iyang gibana-bana nga moabot ngadto sa P2,000 ang sulod sa iyang ATM.
Laing reklamo nga nadawat gikan sa duha ka child development worker tungod kay ang ilang buhatan gilungkab usab.
Ang kapolisan ug mga opisyal sa barangay nisusi sa footage sa closed circuit television (CCTV) sa barangay ug ilang nakita ang duha ka menor.
Ang opisyales sa barangay ug kapolisan nihimo og operasyon diin ilang na-rescue ang duha ka menor nga mga residente sa Cogon, Pardo, Syudad sa Sugbo.
Apan wala sila’y narekober nga butang nga kinawat gikan sa maong mga menor.
Ang nahisgutang mga menor gi-turnover kini ngadto sa City Social Welfare and Development (CSWD).
Samtang si Alesna nagkanayon nga mahibaw-an gyud ang mga tawo nga maghimo og ilegal tungod kay nakaplastada na ang mga camera sa Barangay Poblacion. BDB (BANATNEWS)
- Latest