Dul-an 100 barung-barong sa Pasil Fish Port gidemolis

CEBU, Philippines — Dul-an 100 ka mga barung-barong sa Pasil Fish Port sa Cebu City ang gi-demolis sa mga sakop sa Prevention Restoration, Order, Beautification and Enhancement (PROBE).

Si retired Fire General Anderson Comar, hepe sa PROBE, sa pakighinabi sa The Freeman-Banat News kagahapon nagkanayon nga ang paghawan gisugdan niadtong adlaw nga Huwebes.

"Naay mga payag-payag, mga structure nga kanang gihimo nilag bularan,ang uban gihimo nilag payag-payag aron dira sila mamahuway ba, ang uban naay namaligya og pang gabie na snack, anha napud mangatulog di na mouli," matud pang Comar.

Gani nasuta nga ang uban niining ilegal nga mga barung-barong gihimong bodega. Matud pang Comar wala pa gyud hingpit mahuman ang Pasil Fish Port building apan dunay mga naninda sa lugar nga nagtukod na og ilang mga kubol-kubol.

Nakadugang kini sa kahugaw sa lugar kay bisan ang uban na na mangatulog dili makahikutar sa paglimpyo sa ilang palibot.

"Hugaw tan-awon, hugaw ang palibot, ang lugar di na kaayo ka parking ang mga sakyanan, gamay baya kaayo na atong area nya butangan pa sa nga stocks nila mga lantay, mga banyera, mga styrofoam," ni Comar pa.

Tungod sab sa maong mga kubol-kubol, nihuot tan-awon ang maong merkado apan karon nga nahawan na og balik, niluag kini ug nidako ang lugar. Magamit na sab kini og tarong subay sa kun unsay tumong.

Ang clearing operation giabagan sa mga sakop sa Department of Engineering of Cebu City nga miaspalto sab dayon sa lugar ug naghimo sab og kanal aron kaagian sa tubig.

"Actually sige natang warning ana, sige na pud tang clearing pero mamalik man gud…mao ng sige mig sita mga kada upat ka adlaw," dugang pa ni Comar kinsa taas nga panahon nagsilbing fire marshal sa kabomberohan sa siyudad. — /IBM (BANAT NEWS)