Pagpanakop atol sa demolisyon pinasubay sa balaud PRO7

CEBU, Philippines — Gidepensahan sa tigpamaba sa Police Regional Office Central Visayas Police Lt. Col Gerard Ace Pelare ang presensya sa kapolisan atol sa demolisyon sa kabalayan sa Sitio Casia sa Barangay Bangkal sa Lapu-Lapu City niadtong Miyerkules  aron pagsiguro ang hapsay ug malinawong pagpatuman sa mando sa korte.

Gipasabot ni Pelare, ang maong demolisyon gipasubay sa court order ug gani dunay gihimong pre-demolition conference tali sa demolition team ug sa mga representante sa mga residente kauban silang mga polis.

Si Pelare miingon nga kanunay nilang gitamod ang maximum tolerance sa mga sitwasyong sama niini.

Hatagan og higayon ang mga tawo nga mohimo sa ilang kalihukan basta dili kini maglambigit og kasamok, o pagpanakit  ug kagubot.

Atol sa demolisyon niadtong Miyerkules, pito ka mga tawo apil na ang mga opisyal sa militanteng grupo nga Anakbayan ug AMA-Sugbo ang gisikop gumikan sa giingong pagpanghilabot sa nagpadayon nga demolition team.

Ang mga operatiba sa Lapu-Lapu City Police mikustodiya kang Howell Villacrusis, secretary general sa AMA Sugbo-KMU; Keil Galon, chairperson sa Anakbayan-Cebu; ug Deviemar Opo, Anakbayan member sa Lapu-Lapu City.

Gisikop sab sila si Marjhun Amoroto, Lito Padillon, Cris Gabutan ug Belt Sasar, mga miyembro sa Casia Matab-ang Residents Association.

Si Ferdinand Ypil, chairman of Nagkahiusang Kabus sa Lapu-lapu (NAKALAP), mikwestyon sa maong demolisyon kay matud niya gisaaran sila ni Lapu-Lapu City Mayor Junard Chan nga dili sili demolison sa maong lugar.

Ang Kabataan Partylist Cebu sa ilang gipadangat nga press statement mikondeinar sa pagdakop sa ilang mga kauban nga matud nila igo rang nitabang sa pagpahigayon og anti-demolition campaign. Nanawagan sila nga pabuhian ang mga gidakop.

"If Sen. Bato dela Rosa is so eager to fight terrorism harming youth, if they really want to look for terrorists, then they only need to look at the police and military of our country. There's no need for such investigation. The answer is clear,  suma pa ni Kyle Enero, chairperson sa Kabataan Partylist-Cebu.

Gipanawagan sab nila si Lapu-Lapu City Mayor Junard  Ahong  Chan nga mohimo og dialogue uban sa komunidad ug paminawon ang ilang demanda paghimo og onsite development sa lugar  sa ngalan sa kaangayan. (BANAT NEWS)