Oplan Disiplina ipatuman sa CCPO
CEBU, Philippines — Aron mamentinar ang kahapsay ug kalinaw sa siyudad sa Sugbo ang Cebu City Police Office nihimo og Oplan Disiplina sa Barangay Pahina Center ning siyudad.
Gawas sa pagpatuman sa mga Executive Orders nga gipagawas ni Cebu City Mayor Michael Rama moimplementar sab sila sa mga warrant of arrest.
Gani, sa ilang operasyon niadtong Miyerkules sa gabie tulo ang ilahang nadakpan.
Sigon ni Police Lt. Col. Janette Rafter, Deputy City Director for Operations ug tigpamaba sa Cebu City Police Office nga ang usa nga nadakpan nila dunay kasong frustrated murder ug ang duha mga ginikanan kansang anak nga dunay kaso nakaikyas kay matod pa ilahang gibabagan.
“Mao to naaresto nato ang kabanay for obstruction of justice,” sigon ni Rafter.
Sinugdanan pa lang kini sa ilang gihimo apan sundan pa kini sa mga umaabot nga adlaw diin kadtong mga barangay nga dili kaayo maadtuan sa kapulisan maoy ilahang adtuon.
Didto sa Pahina Central uban sa Cebu City Police Office ang Philippine Drug Enforcement Agency (PDEA) apan tinguha sa kapulisan nga duna pay laing ahensiya sa gobyerno nga makuyog nila sa ilang mga lakaw.
Nagkanayon sab si Rafter nga tumong sab sa ilang gihimo nga mahatagan og seguridad ang katawhan ilabi na nga nagkaduol na ang Pasko ug Bag-ong Tuig ingon man ang Sinulog 2023. — IBM (BANATNEWS)
- Latest