Fluvial procession sa Birhen sa Regla himoon karon
CEBU, Philippines — Gatusan ka mga motor banca ug mga pump boat ang mosalmot sa ipahigayon nga fluvial procession sa imahen sa Birhen sa Regla karong buntag diha sa kadagatan sa siyudad sa Lapu-Lapu.
Lakip sa mosalmot sa kalihukan ang mga sakop sa Philippine Coastguard, kapolisan ug mga stakeholders.
Ang fastcraft nga MV Maica 2 sa Jomalia Shipping nga gihimong galleon maoy sakyan sa imahen sa Birhen sa Regla.
Sugdan ang kalihukan alas 7 sa buntag ug matapos sa pagdunggo sa galleon sa Mulle Osmeña sa Barangay Poblacion nga sugaton usab ni Lapu-Lapu City Mayor Junard "Ahong" Chan ug Kongresista Cindi King-Chan ug dalhon balik ang imahen sa simbahan sa National Shrine sa Barangay Poblacion.
Kini maoy timaan sa pagsugod sa misa novena alang sa kapistahan niini karong Nobiyembre 21, 2023.
Sa wala pa ang maong fluvial procession usa ka sea trial ang gipahigayon nga giapilan sa LGU Lapu-Lapu City, Committee on Fluvial Procession, LLCPO, PCG ug nagkadaiyang stakeholders kagahapon.
Ang pag-agi sa Birhen sa Regla sa Lungsod sa Cordova sa ikaduha nga higayon alang sa iyang fluvial gihangop kini sa katawhan nga Cordovahanon. — /MEL (BANAT NEWS)
- Latest
