Virtual map gilusad sa siyudad sa Lapu-Lapu

CEBU, Philippines —  Gilusad sa dakbayan sa Lapu-Lapu ang virtual map atol sa gipahigayong Trade Fair and Tourism Night nga kalihokan nga gipahigayon sa miaging gabii diha sa Hoops Dome sa Barangay Gun-ob Siyudad sa Lapu-Lapu.

Si Lapu-Lapu City Mayor Junard "Ahong"Chan maoy nangulo sa maong paglusad uban usab ni Kongresista Cindi King-Chan ug mga sakop sa konseho nga gitambongan usab ni Department of Tourism Undersecertary Ferdinand Jumapao.

Ang virtual map maoy labing una dinhi sa Sugbo nga gitumong alang sa paggiya sa mga dumoduong ug mga langyaw nga turista sa pagsuroy sa mga tourist spot sa dakbayan.

Kini maoy bugtong interactive ug informative virtual map dinhi sa Sugbo nga mogiya sa mga turista ug mga residente sa historical landmarks, cultural sites, ug tourist attractions.

Si Mayor Chan miingon nga ang ilang gihimo nga pagmugna og virtual map sa mga dapit nga suroyon aron dali ra nga madiskubrihan ang mga dapit nga angayan nga adtuan sa mga turista.

Pinaagi sa suporta ni Tourism Secretary Christina Garcia-Frasco, masaligon si Mayor Chan ang siyudad sa Lapu-Lapu mamahimong ultimate tourist destination sa nasud.

Gipasalig sa mayor ngadto sa mga stakeholders nga hugot ang iyang pagsuporta sa industriya sa turismo alang sa dugang pa nga pagpalambo niini.  MEL  (BANATNEWS)