American national nananom og marijuana sa condo sikop

CEBU, Philippines —  Nasikop sa Philippine Drug Enforcement Agency (PDEA)-7 uban sa Cebu City Police Office Station 2 ang usa  American national diha sa condominium niini sa dalan Juana Osmeña Extension, Barangay Kamputhaw, Dakbayan sa Sugbo niadtong Miyerkules sa gabii

Dala sa kapolisan ang search warrant nga giluwatan ni Regional Trial Court (RTC)  Judge Jose Nathaniel Salazar Andal sa Branch 24 batok kang Lee Matteson, 75-anyos, US pensioner, lumad nga taga Nebraska United States of America.

Nakuha sa kapolisan gikan sa condominium sa suspetsado ang tulo ka grown potted marijuana nga adunay market value nga P400; napulo ka seedlings sa potted marijuana nga gibana-banang nagkantidad og P1,200; napulo ka seedlings sa potted marijuana nga adunay market value nga P400; usa ka self-sealing plastic nga dunay sulod nga pinaugang dahon sa marijuana; laing self-sealing plastic nga adunay tulo ka liso sa marijuana, indoor grown kit, usa ka cellphone ug non-drug evidence.

Base sa nadawat nga taho sa PDEA-7 nga niadtong tuig 2007 pa nga anaa sa Sugbo si Matteson.

Nasayran sa PDEA nga sa niaging tuig sa Lungsod sa Oslob diin adunay property ang maong langyaw giingong nagtanom usab kini og marijuana didto sa lugar ug gioperasyonan sa kapolisan apan wala madakpi ang suspetsado tungod kay adtong higayona anaa kini sa gawas sa nasud.

Niining ulahi lang, nakadawat usab og report ang PDEA nga giingong nananom na usab og marijuana ang suspetsado sulod sa iyahang condominium unit hinungdan nga gipanid-an nila kini.

Matud usab sa PDEA nga ang langyaw nibutyag kanila nga ang pagtanom niya og marijuana iyaha kining konsumo gumikan kay makatabang kini sa iyang gihambin nga sakit.

Ug ipaambit usab niya kini sa iyang mga higala nga mga langyaw isab.

Nasayran nga ang maong langyaw dugay na nga buwag sa iyang asawa.

Sa laing bahin, bisan pa og mas daghan og nadakpan nga mga ilegalista ang Police Regional Office-7 karong tuiga apan mas menos ang ilegal nga drugas nga ilang nasakmit karon.

Matud ni Police Lieutenant Colonel Gerard Ace Pelare, tigpamaba sa PRO-7 nga nisaka og walo ka porseyento ang mga nadakpan gumikan sa ilegal nga drugas.

Sa Enero 1 hangtud sa Oktubre 31 sa tuig 2022 ang PRO-7 nakadakop og 6,119 ka drug personalities mas menos kini itandi sa 6,630 sa samang mga karong tuiga.

Karon nga tuiga sa samang mga buwan niabot sa 110,707 gramos nga shabu ang ilang nasakmit mas ubos kini ikompara sa 165,582 gramoss nga datos sa PRO-7 sa milabay’ng tuig.

Samtang sa Dakbayan sa Lapu-Lapu, gitanggong sa detention cell sa Lapu-Lapu  City Police Office (LCPO) ang drug pusher nga upat na ka higayon nga nadakpan sa buy- bust operations nga gipahigayon sa mga polis.

Ang nasikop mao si Orlando Taghoy, hingkod ang panuigon, residente sa Barangay Mactan sa maong siyudad.

Si Police Major Bonifacio Pareja, hepe sa Presinto 2 sa LCPO maoy nagulo sa buy- bust operation sa niaging gabii ug nibutyag nga upat ka higayon na nga nasikop sang suspetsado sa buy-bust operations.

Nasakmit sa kapolisan gikan sa suspetsado ang upat ka gramo nga shabu nga nagkantidad ngadto sa P4,000. BDB (BANATNEWS)