Presyo sa bugas gipanglantawan nga ma-stabilize

CEBU, Philippines — Napanglantawan sa gobiyerno nga mo-stabilize ang presyo sa bugas gumikan kay liboan ka mag-uuma sa tibuok nasud ang nagsugod na sa pag-ani sa ilang mga main season crops karong buwana hangtud sa buwan sa Oktubre.

Si Agriculture Undersecretary sa rice industry development Leo Sebastian nagkanayon nga ang pasiunang na-harvest nga humay gilaomang moabot ngadto sa two million metric tons (MMT) sa kataposan sa Septiyembre, ug mosaka ngadto sa three MMT sa buwan sa Oktubre.

Ang maong bana-bana gihimo sa Philippine Rice Information System (PRiSM) sa Agosto 14, 2023 gamit ang satellite data.

Si Sebastian nagkanayon nga sa buwang sa Septiyembre ang PRiSM nitaho nga ang kinabag-an sa 2.3-MMT nga ani maggikan sa mga probinsiya sa Isabela, Cagayan, Iloilo, Nueva Ecija, North Cotabato, Leyte, Oriental Mindoro, Camarines Sur, Palawan, Bukidnon, Zamboanga del Sur, ug Davao del Norte.

Sa kataposan sa buwan sa Oktubre, kadaghanan sa gibana-bana nga 2.9-MMT nga pasi maggikan sa Nueva Ecija, Pangasinan, Tarlac, Isabela, Occidental Mindoro, Cagayan, Oriental Mindoro, Bulacan, Iloilo, Bukidnon, Agusan del Sur, Ilocos Sur, Leyte, ug Camarines Sur.

Matud ni Sebastian nga ang DA ubos sa Masagana Rice Industry Development Program magpadayon sa paghatag sa mga mag-uuma sa humay sa gikinahanglang taas nga ani nga mga liso, abono, biofertilizers, soil ameliorant, makinariya sa uma, ug extension, financial ug marketing support.

Niadtong Sabado ang gobiyerno nagsugod sa pagpanghatag sa cash aid nga P15,000 matag usa sa gagmay’ng retailer og bugas kinsa naapektohan sa bag-ong gipatuman nga cap on rice prices.  Ang cash assistance subay kini sa direktiba ni Presidente Fredinand “Bongbong” Marcos, Jr. nga tabangan dayon ang mga rice retailers nga gikonsiderar nga labing apektado sa Executive Order 39 kinsa nagbutang og cap sa presyo sa bugas nga P41 matag kilo sa regular milled rice ug P45 matag kilo sa well-milled rice.  Ang EO niepekto niadtong Septiyembre 5, 2023. — /BDB (BANAT NEWS)