25 mil punoan sa Marijuana
CEBU, Philippines — Gipang-ibot sa kapulisan sa Cebu City Mobile Force Company (CMFC), NAVFORCEN-7 ug Talamban Police Station 8 ang 25 mil ka punoan sa marijuana nga mobalor og P10 milyones diha sa Sitio Mit-ol, Barangay Tagba-o, Siyudad sa Sugbo.
Ang operasyon gisugdan alas 4 sa kaadlawon kagahapon, Agosto 19, 2023 ug nahuman pasado alas 3 sa hapon sa samang adlaw tungod sa kahilit lugar.
Nailhan na sab sa kapulisan kun kinsa ang nagtanom niini nga mao si Premitivo Ardimer alyas Boy, residente sa Barangay Adlaon ning siyudad apan temporaryo nga nagpuyo Sitio Mapa, Barangay Tagba-o.
Ang suspek padayon pa nga gipangita sa kapulisan. Nailhan siya basi sa mga saksi nga nakuha sa kapulisan.
Sigon ni Police Lt. Col. Dexter Calacar, Force Commander sa Cebu City Mobile Force Company samtang nagpatrolya sila sa naasoy nga barangay usa ka concerned citizen ang mipahibawo kanila bahin sa matud pa marijuana plantation nga nahimutang sa Sitio Mit-ol.
Gi-verify dayon kini sa kapulisan ug nasuta nga dunay duha ka luna nga napuno sa tinanom nga mga marijuana.
Ang unang luna dunay 15,000 ka punoan sa Marijuana nga mokabat sa P6 million samtang ang ikaduhang luna dunay 10,000 punoan nga mobalor og P4 million.
Dali nga gipang-ibot sa mga polis ang mga marijuana ug gisunog.
Nagpahigayon pa og follow up operation ang kapulisan aron madakpan si Ardimer nga pasakaan og kasong kalapasan sa Section 16, Article II sa Republic Act 9165 ang dinakpan. — Romeo D. Marantal (BANAT NEWS)
- Latest
