Housing loan sa mga residente sa Kalunasan giproseso na

CEBU, Philippines — Gisugdan na sa PAG-IBIG ang pagproseso sa aplikasyon sa housing loan sa mga residente sa barangay Kalunasan ug CRCI (Cebu Rehabilitation Center Inc.) aron hingpit na nga mapanag-iya sa mga ukopante ang luna nga iya sa Probinsya sa Sugbo.

Kagahapong adlawa, gitigum sa Kapitolyo ang mga residente nga niuyon nga iagi sa housing loan ang hingpit nga pag-angkon sa luna nga ilang giokuparan karon.

"Nindot kaayo ni nga ehemplo ba nga klaro atong sabot nga ang Provincial Government duna mi ika-offer ninyo nga duna moy kasiguraduhan ana inyong gipuy-an, kamo sad tuman sad mo kay para makauswag ta" matud ni Gobernador Gwendolyn Garcia.

Alang sa mga residente nga miyembro na sa PAG-IBIG, i-evaluate na lang sa mga personnel sa ahensya ang ilang mga dokumento alang sa housing loan samtang kadtong dili pa miyembro giproseso ang ilang aplikasyon aron mahimong lehitimo nga miyembro sa PAG-IBIG aron maka-apply sa nahisgotan nga housing loan.

Dili momenus 114 ang mga residente sa CRCI ang apektado niini, kon diin sila ibalhin sa luna sa Kapitolyo barangay Kalunasan. Samtang sobra 200 usab ang mga okupante nga anaa na daan sa Kalunasan.

Una nang nasabotan sa Kapitolyo ug mga residente nga ibaligya sa Probinsya ang luna niini ngadto sa mga okupante pinaagi sa PAG-IBIG aron sila makapahimulos sa mas barato nga presyo ug taas taas nga payment terms. Samtang ang PAG-IBIG maoy direktang mobayad ngadto sa Probinsya. (BANAT NEWS)