169 ka PDL sa TCJ nigradwar sa senior high school
CEBU, Philippines — Niabot ngadto sa 169 ka person’s deprived of liberty (PDL) gikan sa Talisay City Jail ang nigradwar sa senior high school (SHS) Alternative Learning System (ALS) sa Academia System Global Colleges (ASGC)- Cebu ubos sa pakigtambayayong sa Schools Division sa Dakbayan sa Talisay.
Mao kini ang labing unang higayon nga nipagradwar og mga piniriso ang Talisay City Jail.
Base sa post diha sa Facebook page sa DepEd, si John Rey usa ka PDL nga completer sa General Academic Strand (GAS) sa School Year 2022-2023 nipaambit sa iyang lisod nga naagian kabahin sa iyang tinguha nga makabalik og eskwela human nabulag sa iyang pamilya tulo ka tuig na ang nilabay.
Matud ni John Rey nga pinaagi sa higayon nga gihatag diha kaniya gusto niyang makab-ot ang iyang mga pangandoy sa kinabuhi ug aron mabalik ang pagsalig sa mga tawo kaniya.
Giawhag ni John Rey ang tanan nga maningkamot nga makahuman sa pag-eskwela tungod kay mao kini ang usa sa mga bulawan nga angayan nga ipasigarbo sa kinabuhi nga dili makawat sa ubang tawo ug magamit sa umaabot nga panahon aron makatabang sa tagsa-tagsa ka pamilya ug sa ubang nanginahanglan.
Si Jail Officer 2 Noel Auman, welfare and development staff sa TCJ nagkanayon nga dako og tabang ang programa nga senior high school sa mga PDL aron matuman ang ilang pangandoy nga makagradwar ug gawas niini mamenosan usab ang ilang huna-hunaon nga problema kabahin sa ilang pamilya ug sa ilang kaso.
Si Dr. Alfonso Abasolo, Jr., Education Program Specialist II sa ALS sa DepEd Talisay City Division nagkanayon nga ang programa alang sa mga PDL nakatabang kini sa pagtugot kanila sa pagtungha sa kolehiyo ug pagkuha sa mga mugbo nga kurso ug skills training sa TESDA.
Dugang ni Abasolo nga alang usab kini kanila nga mamahimong kabahin sa komunidad nga aduna pay paglaom nga makaangkon og maayong kinabuhi human sa mga hagit nga ilang naagian. Gie-Ann Tapic ug Theresa March Valle, CNU Interns, BDB (BANATNEWS)
- Latest
