Traffic enforcer gikulata sa iyang gisitar

CEBU, Philippines —  Usa ka 37-anyos nga lalake ang gidakop human niini gikulata ang traffic enforcer sa Dakbayan sa Danao  nga misita kaniya tungod sa wala pagsul-ob og helmet diha sa Highway sa Barangay Poblacion, Danao City niadtong Lunes sa hapon.

Ang gikulata nga traffic enforcer mao si Ritchie Pantoja Abillar, 39,samtang ang gidakop mao si Belden Capuno Prieto, taga Purok 2, Barangay Tuburan.

Sigon ni Lt. Col. Clark Ike Arriola, hepe sa Danao City Police Station si Prieto nagbantay sa trapiko gawas sa DT Durano Integrated School sa maong dapit sa dihang gisitar niini ang suspek kay nagmotor nga wala mag helmet.

Giingong naglalis ang duha hangtud minaog sa motor ang suspek ug gidapatan ang traffic enforcer nga wala makapiog kay gitutokan kini og pocket knife (nga wala ma-recover sa kapulisan).

Si Abillar midangop sa traffic investigator sa Danao Traffic Management Office hinungdan nga gilusad ang hot pursuit operation hangtud naabtan ang suspek diha sa E. Olivar Street, Barangay Poblacion.

Si Arriola miasoy nga desidido mopasaka og kaso ang traffic enforcer kang Prieto.— IBM (BANATNEWS)