13 ka pamilya mihiklin human sa landslide sa brgy Sudlon 2
CEBU, Philippines — Mokabat sa 13 ka pamilya nga gilangkuban sa 57 ka indibidwal ang gipabakwit human sa pagdahili sa yuta kagahapon sa buntag diha sa Sitio Upper Cantipla, Barangay Sudlon 2, bukirang dapit sa Dakbayan sa Sugbo.
Suma pa ni Ramil Ayuman usa sa mga special assistant ni Mayor Michael Rama nga wala ra’y naangol o nasamdan sa nahitabong landslide. Lakip sa panimay nga naguba mao ang gipanag-iya ni Junel Borres diin nadala gyud kini sa yuta.
Base sa tahu gikan sa barangay responder nga si Jhun Carlo Bayot sa Sudlon 2 responders nga namiligro ang ubang panimalay nga maapil sa pagbanlas kun magpadayon ang paglihok sa yuta.
Dugang pa ni Ayuman nga human gipabakwit ang mga molopyo nga nagpuyo sa danger zone gibutangan na pud kini og caution line. Ang ubang panimalay nga namiligro gipanag-iya nila ni Dionesio Borres, Claudio Borres, Cristuto Quid-ol, Von Richard Ortega, Carmelito Fernandez, Samuel Labugo, Gregorio Solon Sr, Arnel Regardo ug Nicolas Fernandez. Samtang mibigay usab ang yuta ug bato sa kabukiran sa sitio Langoyon, Barangay Manipis, Dakbayan sa Talisay kagahapon sa buntag.
Si Jonathan Tumulak, pangu sa City of Talisay-Traffic Operation Development Authority (CT-TODA) nibutyag nga kalit nangatagak ang yuta ug bato sa karsada ug maayo nalang kay walay motorista nga naatlan.
Nagtuo si Tumulak nga nidahili ang yuta human sa sunod-sunod nga pag uwan.
Sa laing bahin ayohon sugod karong gabii (Hunyo 27, 2023) ang tunga nga karsada sa Cebu South Coastal Road (CSCR) habig sa Barangay Lawaan 1, Dakbayan sa Talisay, paingon sa norte hinuon ang kilid niini ang mahimo ra ma agian.
Ang Department of Public Works and Highways (DPWH) mipasalig nga ilang mahuman ang pagtrabaho sa karsada sud sa usa ka buwan. Gabriel C. Bonjoc (BANAT NEWS)
- Latest
