Carbon Night Market gibalik sugod kagabii
CEBU, Philippines — Gianunsyo kagahapon sa Cebu2World Development Inc. nga ilaha na nga gibalik ang Carbon Night Market sugod kagabii, Enero 20, 2023.
Buhaton kini matag Biyernes hangtod sa Domingo , alas 5 sa hapon hangtod sa alas 11 sa gabii. Moabot sa dul-an 80 ka stalls ang maninda anang mga adlawa nga makapuno sa ilang oportunidad nga makabaligya sa ilang mga produktong pagkaon, produkto, delicacies sa Sugbo ug uban pa.
Nahimutang ang stalls niini sa Quezon Boulevard sa Carbon Area.
Dili lang pagkaon ug mga produkto ang makita sa Carbon Night Market, dunay nagkalain-laing mga banda nga imbitahon aron molingaw sa tanan.
Masaligon ang kagamhanan nga mas modaghan pa og samot ang mga tawo nga motikang sa merkado ug dako kini og matabang ngadto sa vendors.
Una kini nga gilusad niadtong Abril sa niaging tuig, nga dunay durasyon sa pipila lang unta ka bulan , apan makadaghan kini nga higayon nga na-extend gumikan sa mainitong paghangop niini sa katawhan.
Nabatyagan usab nga gawas sa mga Sugbuanon, duna pu’y mga bisita nga gikan sa laing laing dapit ang nitikang sa Carbon Night Market.
Giingong nagsilbi na usab kini nga atraksyon nga nagpakita kun unsa ka lami ang mga pagkaon dinhi sa Sugbo. (BANATNEWS)
- Latest
