Tindero na ko, patay

CEBU, Philippines —  Patay ang usa ka manindahay og utanon human kini na knockout dihang gisukmag sa lalaking nibadlong kaniya diha sa Sitio Tabok, Barangay Looc sa Syudad sa Danao sa miaging Sabado sa kaadlawon.

Si Police Corporal Thomas Perez sa Danao City Police Station miila sa biktima nga mao si Mark Gil Albano Nebria, 38, molupyo sa Lungsod sa Compostela.

Samtang gitumbok nga suspetsado mao si  Virgel James Gonzales Hermoso, 42,  nga nagpuyo sa maong dapit. Si Police Lieutenant Colonel Fortunato Ecle Jr. , hepe sa Danao City Police Station miingon nga gikataho sa ilang buhatan ang insidente  alas 3 pasado na ang takna sa Sabado sa kaadlawon.

Matud pa ni Ecle nga nakig-inom ang biktima kauban sa igsoon niining lalaki ug mga higala dihang  giapas kini sa kapuyo kay kini papaulion na.

Gidala sa biktima ang kapuyo sa gawas sa giimnan apan misangpot kini sa mainitong panaglalis.

Taliwala sa ilang panaglalis daw natukmod  sa biktima ang kapuyo nga maoy hinungdan sa pagkabarag niini.

Ang suspetsado nga si Hermoso pagkakita sa gibuhat sa biktima ngadto sa babaye gibadlong niya ang lalaki.

Apan gikatahong nasuko ang biktima ug sila na hinuon ang nagkalalis hangtud nga kini gisukmag sa suspek ug nisarasay kini sa ubos ug na knockout.

Gidala ang biktima sa Cebu Provincial Hospital sa Siyudad sa Danao apan gideklarar kini ni Dr . Nestor Casidre Jesson Lim nga dead on arrival.

Matud pa namatay kini tungod sa hemorrhagic shock o dunay nagdugo sa ilawom sa ulo o sa lawas niini. (BANAT NEWS)