Usa patay, duha angol human nakadasmag og iro

CEBU, Philippines — Patay ang usa ka lalaki nga nagmotorsiklo human kini nalamba diha sa karsada dihang nakaligis og iro niadtong Martes sa hapon diha sa Barangay Sabang, Lungsod sa Sibonga.

Si Police Major Rodgene Co Fudotan sa Sibonga Police Station, niila sa namatay nga mao si Ernie Lagarnia, hingkod ang panuigon, residente sa Barangay Valladolid, Dakbayan sa Carcar.

Atol sa maong insidente naangol usab ang magtiayong Saturnino ug Rosalina Genargue, mga residente sa Lungsod sa San Fernando dihang nalagpot sa gisakyan usab nilang motorsiklo si Lagarnia.

Si Saturnino niadtong higayona mao nagmaneho sa motorsiklo ug nag-angkas si Rosalina.

Base sa imbestigasyon ni Police Senior Master Sergeant Junrel Bacamante nga ang duha ka habig nagbiyahe kini sa managlahing direksiyon kinsa si Lagarnia gikan sa Dakbayan sa Carcar padulong sa Lungsod sa Sibonga samtang ang magtiayon gikan sa Lungsod sa Sibonga paingon ngadto sa Lungsod sa San Fernando.

Matud ni Bacamante nga pag-abot diha sa lugar nga nahitaboan aksidenteng nabanggaan ni Lagarnia ang usa ka libudsuroy nga iro nga kalit nilabang diha sa karsada.

Ug gumikan sa ka kusog sa impact nalagpot si Lagarnia ngadto sa pikas nga lane sa karsada ug napantok ang ulo niini diha sa karsada.

Atol sa pagkalagpot ni Lagarnia mao usab ang pag-agi sa magtiayong Genargue hinungdan nga naigo kini.

Sa ka kusog sa impact usab sa bangga wala na makontrolar ni Saturnino ang manobela sa motorsiklo nga ilang gisakyan nilahos sila sa daplin sa karsada ug nangabunal usab.

Daling gidala diha sa Carcar District Hospital ang tulo apan si Lagarnia gideklarar kini nga patay na nga naabot sa maong tambalanan. —Mary Rose A. Carcille /BDB (BANATNEWS)