Mayor Alegado pursigido nga ipadayon ang  reclamation project

CEBU, Philippines — Hugot nga gibarogan ni incumbent Mayor Joannes Alegado nga ilang gisubay ang mga pamaagi ingon man ang pagkompleto sa mga gikinahanglan nga dokumento alang sa pagpatuman sa 235 ka ektarya nga reclamation sa barangay Tayud sa Lungsod sa. Consolacion.

Kini atol sa gihimong public hearing sulod sa ampitheater sa munisipyo sa maong lungsod niadtong miaging Martes Hunyo 13, 2022.

Lakip sa mitambong sa maong public hearing mao ang mga representante sa napulo ka shipyard nga misupak

sa proyekto, mga opisyal sa lungsod ingon man mga representante sa mga barangay.

Gialigar sa mga shipyard association nga dunay procedural lapses sa wala pa gihimo ang public hearing.

Kusganon gipanghimakak ni incumbent Mayor Alegado ang maong aligasyon ug suma pa niya nga gihimo nila ang tanang paagi sa dili pa ipatuman ang maong proyekto.

Si incumbent Vice Mayor Teresa Alegado nga mitambong sa public hearing mipasabot nga katuyoan sa maong

proyekto ang kalamboan sa tibuok lalawigan sa Sugbo ug dili ang pipila lamang ka mga tawo nga nagpahimulos sa ilang negosyo.

Dugang pa ni bise mayor Alegado nga ang mga molopyo sa maong dapit nga ilang gikonsulta ang pabor gayod sa maong proyekto.

Atol sa public hearing nipasiugda usab og rally sa gawas sa munisipyo ang kahugpongan sa mga mananagat gikan sa siyudad sa Mandaue, Lapu-Lapu City ug Cordova nga hugtanong misupak sa reclamation project. (BANAT NEWS)