P4.5 milyones shabu nasakmit  sa CPPO-SACLEO

CEBU, Philippines — Moabot ngadto sa P4.5 milyones ang kinatibuk-an nga kantidad sa ginadili nga drugas nga nasakmit sa Cebu Provincial Police Office atol sa ilang gihimo nga Simultaneous Anti Criminality Law Enforcement Operations (SACLEO).

Gitug-an ni Police Colonel Engelbert Soriano, Provincial Director sa CPPO sa mga tigbalita nga gikan sa Marso 21 ngadto sa 27 nakasikop sila og 83 ka mga drug personalities sa gipahigayon nga SACLEO.

Sumala pa ni Soriano, moabot usab ngadto sa 120 ka mga ka mga wanted persons lakip ang most wanted ang nasikop usab sa kapulisan.

Duna say 125 ka mga armas ang gitahan ug walo ang nasakmit atol sa operasyon nga gipahigayon samtang duna say daghan nga mga sugarol. —Rowena D. Capistrano/IBM

Oplan Baklas sugdan sunod semana

Ang Cebu Provincial Police Office makig-alayon sa Commission on Election ug ubang ahensya sa gobiyerno alang sa ipahigayon nga Oplan Baklas karong semanaha.

Matud pa ni Police Colonel Engelbert Soriano, Provincial Director sa CPPO magpaabot nalang sila sa Comelec kay kini maoy lead agency sa pagpahigayon sa Oplan Baklas.

Giangkon ni Soriano nga naghitak karon ang daghang campaign materials  nga wala sa gitugot nga lugar sama sa poste, mga punoan sa kahoy ug uban pa.

Si Soriano, niawhag sa mga politiko nga mas maayo tangtangon nalang nila ilang mga campaign materials nga gipahimutang sa mga wala gitugot nga lugar aron ilaha pa kining magamit ug dili masayang.

Gitug-an ni Soriano nga wala silay pilion basta makita nga gibutang sa dili hustong dapit ang campaign posters ilaha kining panangtangon.

Sa pikas bahin, ang Department of Health Central Visayas niawhag sa mga Local Government Units nga ipadayon ang pag regulate ug pag monitor sa mga kalihokan sa mga politiko aron ang tanan dili magkumpiyansa.

Gitug-an ni Dr. Jaime Bernadas, Regional Director sa DOH-7 sa press conference nga dili kalikayan ang pagtapuk-tapok karon sa mga tawo tungod sa mga kalihokan sa politika.

Apan matud pang Bernadas, responsibilidad sa LGUs kay ila kining mandato ang pag-regulate sa mga kalihukan nga magpatapok og daghang mga tawo.

Gidasig usab ni Bernadas ang publiko nga mosunod sa mga gipatumang minimum health standard ilabi na kinahanglan pa nga ang pagpadayon sa covid-19 immunization coverage rate bisan og giluagan na ang mga restriksyon.

Si Bernadas, nitug-an nga dili angay mokompiyansa, aron dili na mobalik sa sitwasyon nga pwerteng daghana ang nangatakdan sa maong sakit kada adlaw.— IBM (BANATNEWS)