CCLEC mihatag og tabang sa mga biktima sa bagyo

CEBU, Philippines — Mihatag og hinabang ang Cebu Cordova Link Expressway Corporation (CCLEC) ngadto sa mga host community niini nga gikusokuso sa bagyong Odette.

Ang Metro Pacific Tollways Corporation (MPTC ) nga maoy naghupot sa maong proyekto nag-apod-apod sa kinatibuk-ang 2,000 ka pakete sa relief goods—1,000 niini nakabenepisyo sa mga pamilya sa Dakbayan sa Sugbo ug 1,000 ka pamilya sa Munisipyo sa Cordova.

Ang mga hinabang naglakip sa bugas, nagkalain-laing canned goods, gatas, kape, ug noodles. Ang matag pakete nagkantidad og P500.00 o kinatibuk-ang P1 milyon alang sa 2,000 ka pakete.

Ang CCLEC mao ang nagtukod ug operator sa 8.9-kilometros nga Cebu-Cordova Link Expressway (CCLEX) project, nga maghatag sa ikatulong sumpay gikan sa isla sa Mactan agi sa Cordova  paingon sa mainland Cebu pinaagi sa Cebu City’s South Road Properties. Ang Metro Pacific Investments Corporation (MPIC) nanghatag usab og lugaw packs, food packs, ug bugas.

Gumikan sa problema sa tubig ug sistema sa kuryente nga gikusokuso sa bagyo, ang MPIC nanghatag usab o mga water filter ug solar lamp.

Kahinumdoman nga sa miaging buwan,nang apod -apod usab og pagkaon  ang MPIC, MPTC, ug  CCLEC  ngadto sa gatosan ka mangingisda sa Cordova.

Ang CCLEX maoy unang toll road project sa MPTC gawas sa Luzon. Ang CCLEX usa ka proyekto sa CCLEC sa pakigtambayayong sa mga local government units sa Cebu City ug sa Cordova. MEL (BANATNEWS)