Volunteer electricians giawhag pagtabang

CEBU, Philippines — Giawhag ni Konsehal David Tumulak ang nga kabaranggayan nga magpatabang og mga lisensyado nga electricians sa ilang dapit nga mobulantaryo alang pasiunang pagsusi sa mga linya nga mga kuryente sa mga tagbalay.

Tumong niini nga masuta dayon ang estado sa kuryente sa usa ka dapit o ba kaha Sitio  ug dali na lang pagpasiga niini sa higayon nga mohimo na og final check ang mga tinugyanan sa Visayan Electric.

Susihon ug ayuhon niini ang mga nangaputol nga kuryente gikan sa mga balay paingon na sa koneksyon niini ngadto sa mga poste.

Suma pa ni Tumulak nga pipila na ka mga barangay ang nibuhat sa maong sistema ug dako kaayo ang natabang niini aron dali nga mapasiga ang ilang lugar.

Dinhi masubay duna ba’y depektoso nga mga kuryente sa kabalayan ug mahibaw-an dayon kini samtang sayo pa.

Sa higayon nga masusi na sa mga volunteers nga electrician ang mga linya sa kuryente sa mga kabalayan, dali nalang kaayo kini nga matrabaho sa Visayan Electric sa pagkonektar niini ngadto sa main nga linya.

Matud pa usa sa mga konsehal nga usa kini sa mga hiyas sa pagtinabangay sa mga Sugbuanon ilabi na karong panahona.

Pinaagi sa pasiunang pakisusi sa mga kuryente , mamintinar usab ang paglikay sa mga tawo gikan sa peligro.

“Para dali ug sayun nalang unya sa VECO ang pag- evaluate sa lugar ug daling mapa balik ang koryente ngadto sa mga lugar nga wala pa magsiga sa pagkakaron,” suma pa ni Tumulak.

Sa update sa  Visayan Electric  kagahapon, naka- energize na kini og 215,796 gikan sa  474,182 ka apektadong kustomer sa ilang franchise area.

Sa pakigtigom  ni Mayor Michael  Rama sa utility companies sa miaging adlaw, nakadawat siya og update niini nga sa dili pa matapos ang buwan sa Enero , mahibalik na ang ilang tanan nilang serbisyo.— IBM (BANATNEWS)