Gullas nasakitan sa ‘pagdaogdaog’ ngadto sa iyang asawa

CEBU, Philippines — Wala na makaantos si Talisay City Mayor Gerald Anthony “Samsam” Gullas sa  gihulagway niyang “below the belt” nga atake nga gibato sa ilang kaatbang sa politika ngadto sa iyang asawa nga si Rhea kinsa magpapili sa pagkamayor sa siyudad sa sunod piniliay.

Tungod niini, nakadesisyon siya sa pag- withdraw sa iyang kandidatura pagkakongresista sa unang distrito ug siya maoy mohulip sa iyang asawa sa pagkamayor sa Talisay.

Si Rhea sab mao nay mohulip kaniya sa kongreso nga walay kontra.

Gipasalamatan ni Gullas ang iyang pamilya lakip na ang mga mayor sa unang distrito nga nisuporta sa iyang desisyon ilabi na kang kanhi City of Naga mayor Valdemar Chiong, kinsa iyang giila nga maoy dakong tabang sa iyang mga desisyon sa politika.

Matud pa ni Gullas dili na niya kayang tan-awon lang nga daug-daogon ang iyang asawa sa ilang kaatbang sa politika.

Si Bise Mayor Alan Bucao ang kontra ni Rhea sa pagdagan pagkamayor sa Talisay.

“One reason why I wanted to seek re-election is that dili na nako kaya motan-aw na daogdaogon lang ako wife sa iya kaatbang of issues that are truly below the belt. I cannot just sit idle and watch as he throws every traditional trick in the book at Rhea,” sigon pa ni Gullas.

Asoy pa niya nga sakit kaayo isip bana ug amahan labayon og bakak nga isyu ang iyang asawa.

“Since I was a child, I was told to respect women. But politics has showed us that people do otherwise,” si Gullas nitataw.

Iyang ipadayon ang iyang nasugdan hinungdan nga nihangyo siya sa Talisaynon nga tagaan og ikaduhang termino isip amahan sa dakbayan.

“Sa among mga kaatbang sa politika, respect begets respect. Rhea and I will show that as we campaign in Congress and as mayor respectively,” dugang pa ni Gullas sa post niini sa iyang Facebook.

Si Bucao sa iyang bahin kusganong mihimakak sa pasangil nga nibato kini og mga dili maayong mga isyu batok kang Rhea.

“Dili intawon na tinood kay siguro ubay ubay naman ang nakahibalo ninyo o nakadungog ninyo sa atong pulong pulong nga gihimo wala gyud tawon ta mobakway og pulong pagpandaot sa iyang asawa, gani ang gipresentar sa pundok lumad Talisaynon mao ra gyud ang pag presentar kon unsa ra gyud among mga plano kung pananglitan tagaan man sa inyong mandato nga mahimong bag-ong opisyales sa dakbayan sa Talisay,” matud ni Bucao.—Gabriel Bonjoc ug Le Phyllis Antojado/IBM

P4.6 million shabu nasakmit

Sobra sa P4.6 milyones nga gidudahang shabu ang nasakmit sa managlahing operasyon sa kapulisan ug sa PDEA-7 sulod lang sa 24 oras.

Nadakpan Huwebes sa gabii diha sa Sitio Lucio Drive, Barangay Calamba ning Dakbayan sa Sugbo si Abner Regudo sa operasyong gilusad sa Mambaling Police Station-11 Drug Enforcement Unit nga gipangulohan ni Police Major Dindo Juanito Alaras ug mga sakop sa Regional Intelligence Unit-7.

Nasakmit kang Regudo ang 675 gramos sa gituohang shabu nga mobalor og P4.5 milyones lakip ang buy-bust money. Bag-ohay pang nakagawas sa prisohan si Regudo tungod gihapon sa samang kaso.

Sunod nga nasikop sa mga tinugyanan sa Philippine Drug Enforcement Agency Central Visayas atol sa implementation sa search warrant diha sa Barangay Basak Pardo si Jay Michael Brendia, alyas Jeffrey Parilla/Jayfox, 30.

Nasakmit kang Brendia, ang 10 gramos sa shabu nga mobalor og P68 mil.

Sunod nga nadakpan pinaagi gihapon sa warrant mao si Alexander Hernani Jr., 26, nga nakuhaan og 20 ka putos nga gituohang shabu nga mobalor og P68 mil.

Matud pa ni Leia Albiar-Alcantara, tigpamaba sa PDEA-7, si Hernani adto magkuhaan og supply sa shabu kang Brendia. (BANAT NEWS)