Lalaki giluba og pangtahi og sapatos patay
CEBU, Philippines — Usa ka tawo ang patay human gidunggab sa usa ka hubog sa dakbayan sa Carcar.
Patay si Angel Barbadillo, 42, residente sa Baranggay Guadalupe sa maong dakbayan Carcar human gikatahong gidunggab ni Paul Harold Lapinid, 51.
Nahitabo ang pagpanunggab sa Sitio Tangasan, Baranggay Valladolid niadtong Domingo sa gabii human ang duha naglalis.
Matud pa ni Police Corporal Argie Noel Espinosa, paghuman og inom ni Lapinid miadto kini sa balay ni Marcus Rivera. Matud pa didto nagkalalis sila si Barbadillo ug Lapinid.
Atol sa panaglalis nikuha og icepick nga gamit pagtahi og sapatos ug gidunggab ang biktima diha sa tiyan ug sa tuong bahin sa hawak.
Daling gidala sa tambalanan si Barbadillo apan patay na kini pagabot didto.
Nakadagan pa ang suspetsado apan nadakpan sa followup operation sa kapolisan nianang pagkagabii. —IBM (BANATNEWS)
- Latest
