Boya nakatabang og limpiyo sa sapa sa Talisay

Cebu, Philippines — Gihulagway sa opisyales sa barangay sa Dakbayan sa Talisay nga dako og tabang ang mga boya nga gipangbutang sa kutay diha sa sapa sa Mananga diin mao kini ang mopugong sa mga basura nga molahos ngadto sa dagat.

Si kapitan Benjie Cabigas sa Barangay Tabunok nibutyag nga usa ka semana na nga ilang giplastada ang boya ug nakita nga aduna kini dako nga epekto sa paglimpiyo sa sapa.

Matud ni Cabigas nga sayon na lang kaayo nga makolekta ang basura tungod kay masangit man kini sa boya.

Ang Siyudad sa Talisay nigahin kini og pundo alang sa maong proyekto ug giapod-apod kini sa mga barangay sa Lawaan 3, Tabunok, Lawaan 2, San Isidro, Dumlog ug Biasong diin ang maong mga barangay maagian sa sapa sa Mananga.

Si Konsehal Peter Earl Alegre, sa Barangay Dumlog kinsa maoy chairman sa committee on environment sa barangay nagkanayon nga dili na lisod kanila ang paglimpyo sa sapa gumikan sa mga boya.

Ang mga boya ginama kini sa mga materyales nga ma-recycle.(BANAT NEWS)