Nag-rosaryo gipusil patay

CEBU, Philippines — Usa ka babayeng senior citizen ang gipusil patay sa wala mailhing mamumuno samtang ang biktima nagrosaryo sa sulod sa iyang panimalay sa lungsod sa Alcantara sa habagatang sidlakang Sugbo sa Biyernes sa gabii.

Ang biktima giila nga si Virgie Irojo, 62, nagpuyo sa Barangay Lawa-an sa Alcantara. Namatay si Irojo human nakaangkon og samad pinusilan sa iyang ulo.

Base sa inisyal nga impormasyong nadawat sa kapolisan gikan sa kapuyo sa biktima nga si Nelson Igarote, 51, nag-estoryahanay siya ug iyang inahan atubangan sa ilang balay samtang si Irojo nagrosaryo sa sulod.

Nakadungog nalang sila og sipang buto sa armas mga alas 10:45 sa gabii. Gisusi ug gitawag dayon ni Igorate ang biktima apan nakurat siya sa dihang nakit-an niya nga naghigda na kini sa kama nga nakaligo sa kaugalingong dugo.

Sa inisyal nga imbestigasyon, gibutyag nga ang wala mailhing mamumuno gituohang mipuwesto sa likod nga bahin sa ilang balay ug didto gipusil ang biktima agi sa lungag sa paril nga ginama sa kawayan.

Si Irojo gidala sa Badian District Hospital apan patay na pag-abot didto sumala pa sa niatimang doktor.

Narekober sa pulisya ang usa ka bala sa wala pa mailhing kalibre sa armas sa kan-anan sa balay sa usa ka Paz Igarote.  Nagpadayon ang kapulisan sa gihimong follow-up nga imbestigasyon kalabot sa pag-ila sa mamumuno ug motibo niini sa pagpatay kang Irojo. — IBM (BANATNEWS)