Pabuto nga ibaligya sa dili haum nga lugar sakmiton

Cebu, Philippines — Gipahibawo sa kabomberohan sa Dakbayan sa Talisay nga duha pa lang ka mall sa siyudad ang nakakuha og permiso nga makabaligya og pabuto karong tuiga.

Kini maoy gibutyag ni Sr. Insp. Arnel Abella, ang fire marshal sa Siyudad. Apan si Abella nipasabot nga kadtong pabuto o fireworks maoy ilang mga produkto.

Gitug-an usab ni Abella nga karong tuiga walay gitagana ang siyudad nga designated area alang sa pagbaligya sa naandan nga mga pabuto.

Mipahimangno si Abella nga matag karon ug unya mosuroy sila og mosakmit sa mga baligya nga pabuto kun gibaligya kini sa dili haom nga lugar.

Samtang sa iyang habig si Police Major Gerard Ace Pelare, pangu sa kapulisan sa dakbayan miawhag sa mga nagtinda sa daplin sa karsada nga dili na lang pugson og pamaligya og pabuto aron dili sila maalkanse.

Gituyo kini tungod kay delikado ang pabuto ilabi na sa lugar nga tapokanan sa mga tawo.

Wala man gi ban ang pabuto apan gilikayan lang nga maka inganyo kini sa pipila ka tawo nga magtapok-tapok samtang naa pa ang hulga sa COVID-19. ( BANAT NEWS)