Record sa minahan sa Alcoy susihon sa PENRO
CEBU, Philippines — Nahuman na ang Provincial Environment and Natural Resources Office (PENRO) sa pagpahigayon og aerial survey sa mining site didto sa lungsod sa Alcoy.
Apan matud ni Rodel Bontuyan ang hepe sa PENRO wala mahuman ang kinatibuk-an nila nga report sanglit ilang gi-consolidate ang datus nga ilang nakuha gikan Dolomite Mining Corporation (DMC) ug Mines and Geosciences Bureau (MGB-7).
“Ang pag process sa mga information ug data nga maong nakuha mura’g mokaon og oras. Kay dako baya na nga area,” matud ni Bontuyan.
Apil sa gihimo karon sa PENRO ang pagkwenta sa volume sa mga nakubkob nga minerales sa mining site, nga dili na labot sa Mineral Processing Sharing Agreement (MPSA) tali sa DMC ug sa gobiyerno.
Nikuha ang PENRO og datus sa DMC ug sa record sa MGB-7.
“Mag depende pud mi kun unsay available nga data sa MGB ug sa ilahang pud nga i-provide sa amoa,” matod ni Bontuyan.
Dugang niya nga ilang ikompara ug i-evaluate ang records sa DMC sa ilang mineral production kon nisubay ba kini sa terms and conditions sa MPSA ug Environmental Compliance Certificate (ECC) ug uban pa nga dokumento.
Matud ni Bontuyan nga dili usa sila mohatag sa ilang findings sa pagkakaron sanglit “premature” pa kini. /IBM (BANATNEWS)
- Latest
