Gikasab-an sa maguwang, 15-anyos naghikog

CEBU, Philippines — Napalgang nagbitay sa usa ka giabandonar nga panimalay sa Sitio Campar, Barangay Licos, Lungsod sa Consolacion ang usa ka 15-anyos nga lalaki nga gituohang naghikog pinaagi sa paghigut og pisi sa iyang liog.

Si Police Staff Sergeant Fernando Gonzales sa Consolacion Police Station niila sa namatay nga si Ralfh Manto Roble nga nagpuyo sa maong dapit.

Matud ni Gonzales nga ang amahan sa namatay nga si Temoteo Roble maoy nakadiskubre sa iyang anak nga nagbitay nga wala na kini panimuot.

Dali kining nangayo og panabang sa iyang mga silingan ug ilang gidala sa Danao Provincial Hospital apan gideklalarar kini sa mga doktor nga dead on arrival.

Si Gonzales niingon nga subay sa gitug-an sa amahan ngadto kanila nga sa niaging gabii ang iyang anak ang gilabhan og kasaba sa maguwang niining babaye tungod kay naguba ang cellphone nga gigamit niini.

Nagtuo ang amahan nga ang kahiubos maoy nakaingon sa paghikog sa iyang anak nga lalaki.

Gitataw ni Gonzales nga pagseguro nga walay foul play ang kamatayon sa anak ilang gitambagan ang mga sakop sa pamilya sa namatay sa pagpaubos sa autopsy sa patay’ng lawas niini. /GMR (BANATNEWS)