Mga beach resorts bantayan sa kapolisan

CEBU, Philippines — Butangan og dugang polis ang mga beach resorts sa Probinsiya sa Sugbo nunot sa pagpaubos na sa General Community Quarantine gikan sa Enhanced Community Quarantine.

Matud ni Cebu Provincial Police Office Director Rhoderick Mariano nga base sa executive order ni Gob. Gwendolyn Garcia nga gitugutan na ang pagkaligo sa dagat gikan sa alas 8 sa buntag hangtud sa ala 1 sa hapon.

Kinahanglan gihapon tumanon ang social distancing ug pagpasuot og mask batok sa coronavirus.

Dugang pa ni Mariano nga bisan pa man nga adunay pagtugot sa mga mga public beach resorts padayon gihapon nga sirado ang mga tourists destinations.

"I think hindi pa ata yung ano kase kailangan pa nilang ayusin di pa kase sinama yung gatherings dapat less than 10 pa, di pa tayo makapag open doon sa talagang tourist destination natin specially yung mga tourist destination natin specially yung mga nangangailangan ng maraming tao kase hindi pa ina-allowed yun under the GCQ," matud ni Mariano.

Subay niini mas pahugtan sa kapolisan ang pagbantay sa mga quarantine border checkpoints kay gidili gihapon ang paglabang sa laing lungsod aron lang sa pagkaligo og dagat.

Ang tugutan lang nga makakaligo ang mga lungsod nga adunay baybayon.

Giangkon ni Mariano nga dakung hagit kini ngadto kanila tungod sa kalapad sa mga beach resorts sa probinsiya.

Subay niini giawhag ni Mariano ang publiko nga mosunod gihapon sa protocol sa quarantine alang sa kaluwasan sa publiko.

Ang resort owners nga masakpan nga wala motuman sa lagda sa GCQ ilang irekomendar sa lokal nga kagamhanan nga pasirad-an. /GMR (BANATNEWS)