Nag-overpricing nangadakpan

CEBU, Philippines — Tulo ka mga tawo nga nasakpang namintaha sa presyo sa baligyang alcohol ug face mask tungatunga niining coronavirus COVID-19 pandemic ang nangadakpan sa gihimong entrapment operations sa mga otoridad dinhi sa Sugbo.

Ang National Bureau of Investigation Central Visayas nidakop sa 27 anyos nga lalaki tungod sa gipaburot nga presyo sa alcohol diha sa Dakbayan sa Mandaue.

Ang nadakpan mao si Eric Pollescas Egas Jr. nga taga Sitio Lumbang, Barangay Pulpogan sa lungsod sa Consolacion.

Matud ni Atty. Wenceslao Galendez dunay nireklamong concerned citizens nga gibaligyaan sila og tag P200 ang usa ka 1 litro sa alcohol nga unta tag P140 lang kini sa Suggested Retail Price (SRP) subay sa mando sa Department of Trade and Industry (DTI).

Dugang pa ni Galendez nga wala motug-an si Egas kun asa kini nakapalit og supply sa alcohol, apan siya miingon nga gipatas-an niya ang presyo kay mahal ang pagpalit niya niini.

Nakuha gikan sa suspek ang 17 ka litrong alcohol nga maoy subject sa operasyon. Sa kinatibuk-an mobalor ngadto sa 3,400 ang nakuha nga mga alcohol gikan kang Pollescas.

Gawas kang Egas, nadakpan sab sa NBI-CV ang 67-anyos nga si Carlos Gidayawan Jr. kinsa gipasanginlang nagpaburot sa presyo sa surgical facemask atol sa gipahigayong entrapment operation diha sa iyang sari-sari store sa Barangay Guadalupe Dakbayan sa Sugbo sa miaging Biyernes.

Gireklamo kining nagpaburot sa presyo gikan sa suggested retail price nga tag P105 gibaligya niya kini og tag P200 matag usa.

Samtang nadakpan sab sa mga sakop sa Lapu-Lapu City Police Office-City Intelligence Branch ang 31-anyos nga babayeng si Mia Tek-ing Benett, taga Barangay Agus sa maong dakbayan.

Matud  pa sa kapolisan ang baligya ni Benett sa 375 ml nga alcohol tag P150  apan sa SRP tag P50 lang kini. Online selling ang pamaagi ni Benett.

Si Benett nasulod sa laang sa dihang nihatud kini sa gi-order nga lima ka kahong alcohol sa Barangay Basak ug didto na kini gidakop sa mga operatiba. Ang matag kahon adunay 30 ka botelyang 375 ml. Nakuhaan sab kini og dugang 30 pa ka kahon sa alcohol. Matud pa ang lima  ka kahon  gibaligya niini kanila og P22,500 o  P4,500 ang matag kahon.

Ang tulo pasakaan og kalapasan sa Republic Act 7581 (Overprice Act) ug RA 73941 (Consumer Act). Romeo T. Limpangog/IBM (BANATNEWS)