PRO-7: ‘Maximum tolerance’ sa rally karong adlawa
CEBU, Philippines — Mopatuman og maximum tolerance ang Police Regional Office 7 sa mga raliyista karong adlawa subay sa selebrasyon sa EDSA People Power Revolution.
Matud ni PRO-7 Director Albert Ferro nga ipatuman niya ang full alert status tibuok Central Visayas.
Gimanduan na sab niya ang tanang hepe nga magmabinantayon sa tanang higayon bisan wala silay nadawat nga hulga sa kagubot.
Dugang ni Ferro nga andam na ang Civil Disturbance Management Team kung dunay kagubot.
Hinuon daku ang pagtuo ni Ferro nga hapsay ang ipahigayon nga lihok protesta sa Sugbo sukwahi sa laing lugar sa nasud.
Sa iyang bahin si Cebu City Police Office Director Engelbert Soriano niingon nga nag-monitor sila sa mga grupo nga mopahigayon og lihok protesta subay sa maximum tolerance nga ipatuman.
Sa pagkutlo niining balita, si Soriano niasoy nga wala pa sila’y nadawat nga advise gikan sa Intelligence Division nga duany mga grupo nga mohimo og lihok protesta.
Panawagan ni Soriano sa mga nagplano nga mohimo og rally nga kun duna lay permit, buhaton ang kalihukan sa saktong lugar ug dili makadaut sa butang sa gobiyerno aron wala’y problema. Decemay P. Padilla/GMR (BANATNEWS)
- Latest
