CREMDEC papuy-an sa mga PUMs

CEBU, Philippines — Temporaryong gihimo sa kagamhanan sa Dakbayan sa Sugbo ang City Resources Management and Development Center sa Barangay Taptap nga butangan sa mga persons under monitoring (PUMs) tungod sa Coronavirus Disease (CoViD-19).

Si Mayor Edgardo Labella kauban ang pipila ka opisyal sa siyudad nagpahigayon og ocular inspection kagahapon sa pasilidad nga moarang og 50 ka tawo.

"I think this is very conducive... especially that the surrounding, there's fresh air, there are plants around," sigun ni Labella.

Gipasabot niya nga ang PUMs ra nga dili mahimo nga i-home quarantine ang ibutang sa pasilidad sama sa adunay mga bata nga ubos sa 10-anyos, tigulang nga labaw sa 65-anyos ang edad, mabdos, ug kadtong "immunocompromised” sama sa adunay diabetes ug kanser.

Ang mga PUMs nga ibutang sa CREMDEC atimanon sa taga City Health Department ug bantayan sa kapolisan.

"Wa gyu'y angay kabalak-an kay ang dalhon dinhi, pareho ra sa dalhon sa panimalay," dugang ni Labella. /GMR (BANATNEWS)