LTO nag-distribute na sa mga plaka sa sakyanan

CEBU, Philippines – Nagsugod na kagahapon ang Land Transportation Office (LTO)-7 og pang-distribute sa mga plaka sa sakyanan.

Nasayran nga usa ka semana ang distribution sa maong mga plaka  nga gipahigayon diha sa Lower Ground Floor, City Wing, SM Seaside, Siyudad sa Sugbo. Matud sa direktor sa LTO-7 Victor Caindec nga ang kalihukan nila karon mao kini ang gisaad niadtong buwan sa Enero nga mag-plate distribution sila sa 2015 ug 2016 nga mga plaka.

“Katong nangutana unsay pasabot aning 2015,  2016 mao ni katong ingon nila nganong nauna ang mga bag-o nga mga plaka, niya sila naulahi kay mao man ning nakaso pa bag-o lang ni-approve iyang pag-release. So, kani siya this represents the entire January to December of 2015, January to December of 2016, unya these are about 31,000 plates in total”, pasabot ni Caindec.

Si Caindec nagkanayon nga ang proseso sa pag-distribute sa plaka kinahanglang dalhon sa mga mo-claim ang ilang OR ug CR ingon man ang proof of identification.

Ug kon nabaligya na ang sakyanan kinahanglang dad-on usab sa bag-ong tag-iya ang transfer documents ug kon wala pa na-transfer dad-on ang deed of sale ug ID.

Gihulagway ni Caindec nga mas dali ang proseso karon diin i-encode nila ang information sa mga mo-claim, pabilinon kini og cellphone number ug pwede kining mobiya o mosuroy una diha sa mall tungod kay mag-text blast lang ang LTO kon andam o pwede na kuhaon ang plaka. /BDB (BANAT NEWS)